ang kaniadto moduaw kanato sa usa ka ting-ulan
samtang nagpahulay ang atong mga kamot sa humog kaayo nga habol
gusto natong matulog apan ang katulogan nanglood kanato
wala nato makigsandurot ang pagduka
og ang atong mga mata nagpunay og dula sa mga tiki
diha sa kisame,
nakita ang mga buslot sa kagahapon
ang mga tungaw og mga agay-ay nga nangahulog
sa kilid sa mga kurtina nga nagpaduyanduyan diha sa hangin sa bintana
ang kagabhion nagpaabot sa pag-abot sa mga bitoon
og bulan, naghinuktok ang kangitngit
og ikaw anaa sud sa imong kalibotan nga itom og puti lamang
karaan, mikupas, dili na gani nimo mabaho ang kahumot
sa mga champaca didtong lugara
kasubo ba, nahulog ang mga lugas sa luha sa imong aping,
miatubang ka sa usa ka kahoy diin ang iyang mga dahon hinayhinay nga
nangahulog sa iyang tiilan
gipunit mo ang usa ka dahon nga bag-o pa lamang nahulog
og imong gidapion sa imong dughan
unsa ba ang bation sa paghulog sa imong kaugalingon sa
dakong giwang sa kagahapon?
wala tingog ang kasing kasing sa dahon
laya na kini, patay na.
ikaw ang ania buhi pa.
karon ikaw mahikatulog na.
buntag na diay?
No comments:
Post a Comment