kitanga mga bata kaniadto, sa akong paghinumdum

si Emak, siya ang atong gihimong nanaynanay sa atong balaybalay

ang salog mga palwa sa lubi nga gitapok ni Boboy

ug ang mga bongbong nga mga langkay kinuha ni Gauden

gikan sa kalubihan nilang Intoy

si Dodong ang atong tataytatay

naglung-ag ta sa lata sa Milkmaid ug balas nga gisagulan sa tubig gikan sa suba.

atong tabil sa mga bintana mga ginit

atong atop mga dahon sa kamansi ug gitahi nga dahon sa lubi ug palwa sa saging

kita ang mga anakanak, ako nga inyong gidanggaan ug Bonot

si Carolina si Monica si Gabino

magsige ko ug katawa nga maghinumdum sa atong mga kaagi sa atong pagkabata

nga sa pagtaob sa suba dapit sa udto maglumba kita ug kaligo didto

sakay sa kabaw ni Gorio ug sa gamay nga gakit ni Enggoy

manguha kita ug bayabas sa bongtod, walay mamadlong

apil na ang mga hinog nga mangga

magpadidit kita sa danlog nga mga sagbot

magisigi lang kita ug unot-unot

wala kitay mga relo, gani wala kitay gihunahuna sa paglabay sa panahon

wala usab kitay mga tsinelas kay magtiniil ra man kita sa lapok nga dalan

didto sa mga basakan labay sa sapa salom sa suba

naghubo lang kita nga nangaligo sa sapa

kitang mga lalake nga wala pay mga tuli sagol sa mga babaye nga wala pay tutoy

pagkamalipayon, pagkamalinawon, pagkakontento nato sa atong kinabuhi

lahi na gayod karon. Dili pa ako andam nga mosugid kanimo kon unsa ba ang nahitabo

kanila ug kanako. Dili ko una tandogon ang ilang mga kalag. Gipangita ko pa ang mga nobenahan

ni Lola Pacing. Hinayhinayon ko lang ug sulat.

Kay basin og magsakit na hinoon ang akong dughan.