FULL MOON ON TOP OF A CHAMPAGNE PALM'S TIP

Pagmata Ug Sayo
(Alang kang Jayson)

Pagmata ug sayo. Pil-a ang habol.
Kanang hapsay sa imong uluhan.
Iyabyab ang mga alugnan aron
Walay abog ug kaspa nga mabilin.

Panamin. Kuhaa ang mga muta.
Panghilam-os. Panghimogmog.
Saboni pag-ayo ang imong aping.
Panarapo. Butangi ug gel ang
Imong buhok aron morag presko.

Isuot ang imong paboritong polo.
Ug karsones. Pasinawa ang imong
Mga sapatos. Isuot usab. Pagmedyas
Ug puti. Lingkod sa imong naandan.

Ingna ang imong sulugoon nga
Dakpon na ang manok bisaya sa
Inyong nataran. Ipaihaw. Pakuhaa
Ug daghang tanglad. Ipadukduk
Ang tulo ka luy-a ug ahos ug sili.

Tinola nga manok ang putahe
Karong adlawa. Init nga sabaw
Ang imong higopon. Ingna ang
Imong mama nga mosimba ka
Ug sayo karong sabadoha.

Pagkahuman, mohapit ka sa
Tindahan mopalit ug chiffon cake.
Ipaputos sa silver paper, Ipatagkos ug golden ribbon.
Palit lang sab ka ug mga colored nga kandila
Kanang motali sa imong edad

Ayaw kagool. Wad-a ang kasakit.
Walay igong rason nga ang tawo
Dili maglipay. Itaktak ang mga
Kahiubos nga morag mga abog
Sa imong sapatos. Ipangluwa
Ang mga plema sa kahigwaos.

Paglipay. Lipaya ang imong
Kaugalingon. Daghan ang nag
Mahal kanimo. Ang imong kagool
Ila usab na kagool. Ayaw pagpalabi
Sa kasakit.Dunay utlanan ang kasakit
Sama ra usab sa kalipay.

Nagpaabot ang imongKapalaran.
Ayaw paglangay pagdool Kaniya.
Didto. Didto sa dapit sa Tumoy
sa imong kabalaka. Nagpaabot
Ang imong hinigugma. Ayaw
Paglangan. Dagan.Hawid kaniya.

Hagki siya. Gaksa. Ayaw ug iyak.
Katawa. Pahiyom. Hagwaa ang imong
Kapalaran. Dugay ka na niyang gihandum.
Maayong pag-abot. Maayong paglakaw.

Maayong adlaw kanimo Higala.
Magtagay kita karon sa imong
Adlaw nga natawhan.